Mèt Keuninginnedaag 1980 opende Matsje de Boer ziene kaffee La Bonne Femme. Lei en Louis kóste Matsje vaanoet La Patraque en gónge filicitere. Dao woort de gedachte gebore um dao te rippetere. Haaf oktober 1980 zien veer dat ouch goon doen. Oondertösse waore de femilies Hameleers vaan St.Pieter en vaan de Polvertorestraot touwgetrooje. De ‘identiteit’ vaan de ierste liechting Tête de Veau woort aldus bepaold door de 4 koppele pa en ma Bovens, pa en ma Hoogma, pa en ma Hameleers (St.Pieter) en pa en ma Hameleers (Polvertorestraot). Eder lid vaan Tête de Veau mós ein vaan die 4 koppele kinne. De 4 koppele woorte ‘iere bendsje’ of ‘iere-bendinneke’ vaan Tête de Veau. Tijdens de rippetities op zoondegmörge stoont veur hun ‘ne stamtisch mèt veendelke gereid.

De Sous Bras Band greujde ’t twiede jaor enorm. Bekans 80 maan stoon op de ierste grópsfoto dee nog lang in de Bonne Femme bove ’t bufèt heet gehaange. Al in jannewarie 1981 voont ’t ierste Nuijaorskonzèr plaots, mèt Eurovisiemarsj en zoe. ‘ne Bonne Femme-wals woort gesjreve. Muzikaol waor Rob Christiaans aongeweze es ‘stekzwejjer’. Heer of Han Hoogma leide de rippetities. Door die twie zien de mieste medleys en nómmers (Duitse Wals-medley, Beatles-medley) in ’t ierste meziekbeukske versjene.

’t Ierste pleetsje had al de vörm vaan ‘ne sousbras en waor vaan kartong. Dao zien ’rs 50 vaan gemaak. Die zien in ’t twiede jaor vervaange door plastic exemplare (100 stöks) mèt dezelfde lay-out. In ’t derde jaor zien obbenuits 150 pleetsjes gemaak, mer noe al in de lay-out boe-in ouch de veendel is oetgeveurd. Väöl leie kraoge e pleetsje mèt ‘ne bijnaom: bij eder rippetitie waor op dees meneer ’n ‘ceremonie protocollaire’ ingeboud.

Leon Hameleers z.g. naom in 1981 ’t kretsersjap op ziech. Mèt Han, Lei en Theo vörmde zie ‘de Wijze Commissie’ (WC), umtot veer gei bestuur wouwe. De hermenie besloot gein groete kas aon te hawwe en gein bezittinge te wèlle. Oetzundering waor de ierste dikke zjiem (veur 100 gölde gekoch vaan ’t Hoesorkes vaan MVV, mèt natuurvelle), ‘ne kleine bariton (späolde Ben Hameleers op, door häöm euvergekoch) en de veendel.

Vaanaof 1982 hadde veer twie ‘sponsore’, in de persoene vaan Rob Adolph en Piet Lonis. Zie woorte ‘Vrund’ vaan Tête de Veau en betaolde 100 gölde per jaor. Daodoor waor jaore gein cóntributie nudeg.

Ederein dee oets lid waor vaan Tête de Veau, blijf dat tot in d’n doed. ’t Pleetsje (dao zien ’rs noe mie es 450 oetgereik) blijf persoenlek bezit, en me blijf ouch altied welkom. De ierste 50 pleetsjes waore dus vaan kartong. Soms zuut me nog eine demèt loupe, miestal leie oet 1980 die noe in Holland of daoboete woene en Mestreech weer ins bezeuke.

Matsje en Bertsje de Boer drage mèt iere ’t pleetsje mèt de naom ‘hospes’ en ‘vrouw vaan d’n hospes’. Doortot La Bonne Femme ’t op zoondag ummertouw drökker kraog, zaote veer de normale gaste dèkser in de weeg. Nao 9 jaor is de hermenie in prima verstandhawwing vertrokke. Veer höbbe twie sezoene gerippeteerd in de Slik, de popkelder in de Ravelijnbuurt, meh bleve verzamele mèt vastelaovend in La Bonne Femme. Nao twie jaor höbbe veer ei jaor gerippeteerd in Abrahamslook en vaanaof 1991 zaote veer in de Momus, iers in de achterzaol vaan St. Joezep, later in de kaffee, in de bove-salon of in de kelder. Veer höbbe dao zeker 4 wisselinge vaan kastelein mètgemaak, en eveväöl verbouwinge.

In 2000 zien veer euvergestap nao D’n Awwe Stiene, boe veer bij Jo en Marij ’n gasvrij oonthaol höbbe gevoonde. Neet veur niks zien zie beneump tot ‘Iere Hospes’ vaan Tête de Veau.

Oondertösse waor Nol Beckers habsjaar gewoorde (en later ouch kretser) en heet Jan van Bilsen ziech ’t muzikaol gebäöre aongetrokke. Mèt Hugo Kuipers en Erik Honée  wèrke zie aon ’t repertoire. Herremenieke Sjrouf Los heet ziech beij TDV aongeslote en heet veur verjonging en un muzikaal impuls gezörrig. De Sous Bras Band is in ’t sezoen 2007-2008 alweer in gooj verstandhawwing vertrokke oet de Awwe Stiene nao kaffee FM op de Merret, dee door twie leie weurt gerund. Meh nog dèks kin me Tête de Veau ouch aontreffe in de Mariastraot of op de Graonmerret.