Maag iech uuch de Sjuivesectie veurstèlle? De bekinde klaankkleur vaan TDV weurt allum geapprecieerd. En in 't Mestreechse is eus herremenieke wereld beroemp, meh aoch boete eus gemeintegrenze zien veer gere gezeen en gehuurd. Vaan Bemele tot in Poix de Picardie, vaan Heugem tot in Almelo höbe veer al meinig fieske opgeluusterd. De straot is eus podium met op de stóp 't hoeg geierd pebliek. Sjevroaje. Al is 't mer vaan de roete die gevierlik metrammele. Mèh boe keump noe dee elegante, harmonieuze sound preceis vaan dan vreug geer uuch aof? 't Steit vas dat eus slaagwerrek en trompötte hiel fien speule, deks aoch same. Baswerrek, slaagwerrek en die 128 valse trompötte maake daor ech wel get sjoens vaan. Mèr... wee zien oer goot te luuster lègk huurt get bezeunders. Zoonder dat klein bitsje extra, dat 'je-ne-sais-quoi' zow 't herremenieke klinke wie eeder aander sambaband. De groete krach noe vaan eus bende kump oet 'n instremint dat de ritmiese trommelsleeg elegant verbint met de sjèl-hèl-en-valse trompötte en dat weer harmonieert met 't zwoele baswerk. Veer höbbe 't netuurlijk euver niks minder es de Sjuif (mèt hooflètter!); 't raffinemint vaan TDV! Binne eus sectie gein ellebaogwerrekers, gein braniemeekers, gein iech-zal-wel-'ns-laote-huure-wat-iech-kin-holland-got-tellent-sjotelsplakke, gein bling-bling-iech-höb-aoch-'n-trompöt-meh-iech-kin-d'r-neet-op-speule-playbackers. Nein gewoen ordinair luij, mèr met talent. Wie d'n Goevernör; Oonder dee knievel zit ambrezjuur boe Jean Lambrix zjeloes op is. Theo sleit brogge tösse de nommers en spölt fein trombonepartije. Sjèrke leg 'n muzikale basis boe de res op kint veurtbowwe (es 'r neet moot zjurere), Erik (d'n tandarts) spölt de sjoenste tegemelodië op zien ventieltrombone, 'ne èchte virtuoos. Daniëlle zörg achter in de herremenie veur de nudige oondersteuning en Ingrid deit dat aoch soms achter, soms veur, zjus boe dat nudig is. Dao kinste altied op bowwe. Zjaak en Jean-Marie vindste aon de zeilijn, boe ze 't euverziech bewoare en controleere of tot d'r geine (vaan de trompötte) stiekem pèls geit hole (lees: ziech oet de veuj maake um mer neet te hove speule). Euveral en nörreges vinste Maj Sigaar, 't raos ADHD-erke vaan us. Zet ummertow in, op 't zjuste memint es niemes 't verwach; es ederein de piep leeg heet. Sjiek um te zien wie daan weer eederein obbenuijts enerzjie kreig en weer geit speule. Pieter is wie 'ne rots in de branding. Oonverstuurbaar deit 'r met en liet 'r ziech neet vaan de weis bringe. Ron euze randstedelike hölleptroep steit z'n menneke in 't tumölt. Mèh deen Alex vaan us, dee kin zellevers note leze! Door 't jaor liene veer 'm oet aon die vaan Sint Zoep. Dao kin 'r zien ammezuur op peil hawwe en kieke wie 't neet moot. Mer es 't daan vastelaovend is daan hoof 'r ziech neet mie in te hawwe en in de pas te laope daan gief 'r gaas. Zellef laop iech aoch lekker in de weeg en laot iech een geveulige toen hure, es iech neet aon 't skië bin. Zoe zeet g'r dat v'r euver de ganse linie de bende bieijn hawwe, sture en mennege, en 't zow miech niks verbase en aoch Leon vaan daorbove aoch nog 'n gooi hand drin heet. Es geer aoch zin höb um eus sectie te kaome versterreke daan kin dat altied. Nao de ballotage, bodycheck en korte interne opleiding kint geer zoe aon de geng. Dat geer neet kint speule is 'n pre. Geer moot wèl op 'n bepaolt academies dinkniveau functionere: geer mooit kinne tèlle vaan ein tot zeve. Komp geer mer tot drei daan raoje veer uuch aon um bei de trompötte of tuba's te goon. (Reclamere tege dis gaank vaan zake kin es geer einmaol bei de trompötte staot ingesjreve.) Laot de Sjuive mèr sjuive ! Erik met de Herteheurens